Pages

Thursday, February 3, 2011

പെണ്‍സുഹൃത്ത്.

(സൗഹൃദം എന്ന വാക്കിന്‍റെ വിലയിടിക്കുവാന്‍വേണ്ടിയുള്ള ബോധപൂര്‍വ്വമായ ഒരു ശ്രമമല്ല. ഒരു ഫോണ്‍കോളില്‍ ആരംഭിച്ച് പടര്‍ന്നു പന്തലിക്കുന്ന സൌഹൃദങ്ങള്‍ (വൈകൃതങ്ങളും) ഒരു യാഥാര്‍ത്യമാണ്.)

ഓര്‍ത്തിരിക്കാത്ത നേരത്ത് ചാരത്ത്
പെണ്ണൊരുത്തി പറന്നണഞ്ഞെന്നില്‍
കണ്ടതില്ല ഞാന്‍ കണ്ണാലെയെങ്കിലും
തൊട്ടറിഞ്ഞെന്‍റെയുള്ളാലെയിന്നലെ.

കള്ളിയവളെന്‍റെ ഉള്ളിന്‍റെയുള്ളിലെ-
ക്കരളുകൊത്തിപ്പറന്നുപോയെങ്കിലും,
പകരമായിഞാനാപ്പെണ്‍ മനസ്സിന്‍റെ-
യുള്ളില്‍ ചൂണ്ട കൊളുത്തിയെറിഞ്ഞതും.

കൂട്ടുകാരിയായ് കൂടെ നടന്നവള്‍,
കൂട്ടിലോ എന്‍റെ കൂടെക്കിടന്നവള്‍.
കൌതുകത്തോടെ കലഹിച്ചു കണ്ണിലെ-
ക്കാമമെന്നേ തിരിച്ചറിഞ്ഞെന്നില്‍ നീ.

സൌഹൃദത്തിന്നതിരുകള്‍ ലംഘിച്ച്
പുതിയ ചങ്ങാത്ത നിയമങ്ങളെഴുതി നാം,
ചങ്കുകീറിപ്പരസ്പരം കൈമാറി,
മറകളില്ലാതെ മനസുകള്‍ കൈമാറി.

പങ്കുവെച്ചു, പറഞ്ഞുനാം കാമവും,
കാട്ടുവഴിയിലെക്കാരാഗൃഹങ്ങളും.
തൊട്ടുനോക്കി, എന്‍ കൈകള്‍ തരിക്കുന്നു,
ചുട്ടുപൊള്ളുന്നു, ദേഹം വിറയ്ക്കുന്നു.

കൌതുകങ്ങള്‍, രഹസ്യങ്ങള്‍ നമ്മളില്‍,
ചലനമുണ്ടാക്കുമോരോ വികാരങ്ങള്‍.
ഏറെനാളായുറക്കമിളച്ചതും
ഏറ്റുമുട്ടിത്തളര്‍ന്നു നാം വീണതും.

കപടമൂല്യ സദാചാരബോധങ്ങള്‍
കടലില്‍ മുക്കണം തീയില്‍ക്കരിക്കണം,
കടലിനക്കരെ ക്കാണുന്ന കാഴ്ചകള്‍
കടമെടുക്കണം, കാലം കഴിക്കണം.

1 comment:

  1. സദാചാരങ്ങള്‍ ഉണ്ടാക്കിയവന്റെ മണ്ടക്ക് കൊടുക്കണം..ഹും

    ReplyDelete